Në mungesë të Shqipërisë, Kosova përfaqëson e vetme letërsinë shqipe në ngjarjen më të madhe botërore të librit, duke sjellë zërin e autorëve shqiptarë në një skenë ndërkombëtare.
Kosova po përfaqëson letërsinë shqipe në Panairin Ndërkombëtar të Librit në Frankfurt, ngjarjen më prestigjioze të botës së botimeve, që mbahet nga 15 deri më 19 tetor 2025. Ky panair, me traditë mbi shtatë dekada, mbledh çdo vit më shumë se 100 vende pjesëmarrëse, mijëra profesionistë të industrisë së librit dhe qindra mijëra vizitorë nga mbarë bota.
Në mungesë të Shqipërisë, është Shoqata e Botuesve të Kosovës, me mbështetjen e Ministrisë së Kulturës, Rinisë dhe Sportit, që ka marrë përsipër të përfaqësojë gjuhën dhe letërsinë shqipe në këtë skenë ndërkombëtare. Stenda kolektive e Kosovës ndodhet në Sallën 4.1 të panairit, ku janë ekspozuar qindra botime të reja dhe përfaqësohen mbi 20 shtëpi botuese nga vendi, duke përfshirë autorë të njohur dhe zëra të rinj të letërsisë bashkëkohore.
Pjesëmarrja e Kosovës në këtë ngjarje simbolizon jo vetëm prani kulturore, por edhe një afirmim të identitetit letrar shqiptar në hapësirën evropiane. Përmes këtij angazhimi, Kosova synon të zgjerojë bashkëpunimet ndërkombëtare në fushën e botimeve, të promovojë përkthimet e autorëve shqiptarë dhe të forcojë profilin e librit shqip në tregun global.
Organizatorët kanë theksuar se interesi i vizitorëve për stendën kosovare është rritur nga viti në vit, ndërsa pritet që edhe këtë edicion të ketë takime mes botuesve, përkthyesve dhe përfaqësuesve të institucioneve kulturore që synojnë bashkëpunime të reja në fushën e letërsisë dhe përkthimit.
