Nga Luzerni në skenat ndërkombëtare, ansambli “Shqiponja” kthehet në simbol të identitetit shqiptar në diasporë
Në Zvicër, një grup të rinjsh shqiptarë po e kthejnë vallëzimin folklorik në një mision kulturor, duke i dhënë jetë trashëgimisë së të parëve në një vend të huaj. Ansambli “Shqiponja”, i riformuar në vitin 2022 nga motrat Barbara dhe Denisa Merturi, është sot një prej zërave më të fortë të diasporës shqiptare në ruajtjen e identitetit kombëtar.
Me rreth 30 anëtarë të moshës 14 deri në 31 vjeç, ky ansambël nuk është thjesht një grup artistik, por një platformë ku rinia shqiptare në diasporë mëson të ndjehet krenare për rrënjët, duke u integruar njëkohësisht në shoqërinë zvicerane. Përmes provave, performancave dhe aktiviteteve kulturore, ata jo vetëm që ruajnë traditën, por e sjellin atë me energjinë e brezit të ri.
Denisa Merturi, kryetare e ansamblit, thekson se qëllimi është të krijohet një urë mes brezave. “Është sfidë të ruash gjuhën, vallet dhe zakonet në një realitet të huaj, por kjo është edhe forca jonë: tradita na mban gjallë dhe na jep identitet,” -shprehet ajo.
Ansambli “Shqiponja” ka marrë pjesë në festivale e aktivitete të rëndësishme kulturore, duke kulmuar me performancën në Alba Festival, ku bashkuan vallet tradicionale shqiptare me ritmet moderne të DJ UKAY, një bashkëpunim që tregoi se folklori mund të gjejë gjuhë të re edhe në kohët moderne.
Veç performancave, “Shqiponja” është e lidhur ngushtë me komunitetin shqiptar përmes bashkëpunimeve me shoqata dhe institucione kulturore si “Nëna Terezë”, “Arbëresha” apo Misioni Katolik Shqiptar në Luzern. Këto partneritete e kanë bërë ansamblin një pikë referimi për kulturën shqiptare në diasporë.
Mesazhi i tyre për rininë shqiptare është i qartë: “Integrohuni me dinjitet, arsimohuni dhe ndërtoni të ardhmen tuaj, por mos harroni rrënjët. Tradita është thesari ynë më i çmuar.”
