Vallja, kënga, tradita dhe arti shqiptar do të sjellin një mbrëmje të veçantë në zemër të Zvicrës, në nder të Ditës së Flamurit.
Komuniteti shqiptar në Zvicër do të festojë Ditën e Flamurit me një mbrëmje të madhe kulturore në Winterthur, ku ansambli “Trojet” ka organizuar një koncert festiv më 29 nëntor 2025 në Hotel Zentrum Töss. Ngjarja, e cila pritet të mbledhë qindra pjesëmarrës, synon të sjellë emocionin dhe krenarinë e 28 Nëntorit përmes artit dhe traditës shqiptare.
Valltarët e ansamblit “Trojet” do të prezantojnë programin më të pasur të vitit, me motive e kostume nga të gjitha trevat shqiptare, duke krijuar një atmosferë kuqezi plot gjallëri. Pjesë e skenës do të jenë edhe kori i grave “Lyra” nga Cyrihu, si dhe artistët e njohur: Luljeta & Drita Fetahu, Arbnor & Rrezart Kuqi, Marisa Murtezi, Baca Shaq, Melisa Tafilaj dhe Eliza Zeqiri, të cilët do të sjellin këngë tradicionale e moderne shqiptare.
Mbrëmja do të pasurohet edhe me një ekspozitë arti. Artistja Valbona Gashi Shala do të prezantojë koleksionin e saj “Medalionët nuk heshtin”, duke i dhënë eventit një dimension të veçantë kulturor dhe reflektues.
Të pranishmit do të kenë mundësi të shijojnë edhe ushqime tradicionale shqiptare, duke sjellë aromën e atdheut në Winterthur dhe duke e bërë këtë natë edhe më të veçantë për diasporën.
Hyrja në aktivitet është falas, duke u dhënë mundësi të gjithë të interesuarve të festojnë së bashku Ditën e Flamurit përmes artit, kulturës dhe bashkësisë shqiptare në Zvicër.
