Edicioni i parë vjen në kuadër të festimeve të 28 Nëntorit dhe sjell artistë, ansamble dhe një recital të veçantë nga aktori i njohur Xhevat Limani.
Qyteti i Lozanës do të shndërrohet në qendër të kulturës dhe traditës shqiptare më 15 dhe 16 nëntor 2025, teksa do të mirëpresë Festivalin Folklorik “Ilirët Jehojnë”, një aktivitet i ri që synon të bashkojë diaspora shqiptare përmes artit, valles dhe trashëgimisë folklorike.
Ky edicion i parë zhvillohet në nder të Ditës së Flamurit, duke i dhënë festimeve të 28 Nëntorit një karakter të veçantë artistik. I ftuari special i festivalit është aktori me famë ndërkombëtare Xhevat Limani, i cili do të mbajë një recital artistik kushtuar kësaj dite të shenjtë për shqiptarët.
Festivali pritet të sjellë një atmosferë të jashtëzakonshme ku do të ngjiten në skenë ansamble folklorike, këngëtarë, valltarë, artizanë e përfaqësues të kulturës nga të gjitha viset shqiptare, si dhe nga komunitetet shqiptare që jetojnë në vende të ndryshme të Evropës. Programi i pasur artistik synon të ruajë e promovojë trashëgiminë mbarëkombëtare përmes valleve, këngëve tradicionale, kostumeve dhe aktiviteteve shoqëruese kulturore.
Organizimi i festivalit drejtohet nga Fatime Kalimashi, ndërsa në Këshillin Organizator bëjnë pjesë Prof. Dilaver Kryeziu, Isak Aliaj dhe SHKA “Ilirët”. Juria profesionale përbëhet nga studiues të njohur të muzikës dhe folklorit: Prof. Dilaver Kryeziu, Prof. Sami Piraj dhe Emir Dizdari.
Moderimin e dy netëve festive do ta realizojnë Defrim Methasani dhe Mirjeta Aliaj, duke sjellë ritmin dhe emocionin e traditës shqiptare në çdo segment të festivalit.
Organizatorët theksojnë se “‘Ilirët Jehojnë’ nuk është vetëm një manifestim artistik, por një frymë bashkimi që rikujton rrënjët tona dhe përcjell trashëgiminë shqiptare te brezat e rinj në mërgatë.”
Lozana është gati të tingëllojë në ritmet e këngëve e valleve shqiptare, duke sjellë një festë të madhe ku bashkohen arti, identiteti dhe krenaria kombëtare.
