Autorja e njohur shqiptare Lea Ypi prezantoi në kryeqytetin suedez librin e saj më të ri “Të poshtëruar”, duke sjellë një reflektim të thellë mbi lirinë, kujtesën dhe përvojën shqiptare në botën bashkëkohore.
Në ambientet e Qendrës së Kulturës në Stokholm, shkrimtarja shqiptare me famë ndërkombëtare Lea Ypi u takua me një publik të gjerë lexuesish për të prezantuar librin e saj më të ri “Të poshtëruar”. Takimi u shndërrua në një bashkëbisedim të hapur dhe emocional mbi rrënjët, kujtesën dhe lirinë, tema që përshkojnë gjithë krijimtarinë e autores.
Gjatë diskutimit, Ypi ndau me të pranishmit procesin krijues të veprës dhe historitë që e kanë frymëzuar për ta shkruar, duke e vendosur librin në një linjë të natyrshme pas suksesit të veprës së saj “Të lirë”, që është përkthyer në dhjetëra gjuhë dhe ka marrë vlerësime të shumta në arenën ndërkombëtare.
Në ngjarje morën pjesë Ambasadorja e Republikës së Kosovës në Suedi, Shkendije Geci-Sherifi, dhe i Ngarkuari me Punë i Ambasadës së Shqipërisë, Eno Çollaku, të cilët zhvilluan një bisedë miqësore me autoren dhe vlerësuan ndikimin e saj në letërsinë bashkëkohore shqiptare.
Ata theksuan se Ypi, përmes veprave të saj, ngre pyetje të forta mbi identitetin, moralin dhe përgjegjësinë kolektive, duke e kthyer përvojën shqiptare në një rrëfim universal mbi lirinë dhe njeriun modern.
Ngjarja u prit me interes të madh nga lexuesit suedezë dhe shqiptarë të diasporës, të cilët e ndoqën me vëmendje diskutimin dhe e përshëndetën autoren për qasjen e saj intelektuale dhe humane.
Ky aktivitet letrar dëshmoi edhe një herë se zëri i Lea Ypit vazhdon të jetë një urë mes Shqipërisë dhe botës, duke sjellë përmes letërsisë një dialog të hapur mbi historinë, kujtesën dhe dinjitetin njerëzor.
