Një komb, një flamur, një atdhe: Dita kur Gjermania u bë sërish një
Më 3 tetor 1990, pas gati gjysmë shekulli ndarjeje, Gjermania u ribashkua zyrtarisht. Ishte dita kur një komb i ndarë nga dhuna e historisë, nga Lufta e Dytë Botërore dhe Lufta e Ftohtë, më në fund e gjeti veten sërish në një tërësi të vetme.
Ndarja kishte nisur që në vitin 1949, kur Gjermania u nda në Lindore dhe Perëndimore, nën ndikimin e superfuqive të kohës. Berlini, kryeqyteti simbol, u bë qendra e asaj ndarjeje dramatike: në vitin 1961 u ngrit Muri i Berlinit, një plagë betoni dhe tela me gjemba që ndau familje, shokë, dhe i ktheu gjermanët kundër njëri-tjetrit. Për gati tre dekada, gjermanët e Lindjes jetuan nën një regjim totalitar, duke parë Perëndimin vetëm nga larg, në ekranet e ndaluara të televizorëve dhe ëndrrat e lirisë.
Por historia nuk qëndroi e ngrirë. Në vitin 1989, nën presionin e protestave popullore, krizës ekonomike dhe ndryshimeve të mëdha në Evropën Lindore, muri ra. Imazhet e atyre ditëve, kur qytetarët e Berlinit me çekiçë e lopata çanë gur për gur murin e turpit, janë ndër më të fuqishmet e shekullit XX.
Ribashkimi, i finalizuar më 3 tetor 1990, ishte një akt historik i mbushur me emocion: një komb që pas dekadash dhimbjeje, më në fund e rigjeti vetveten. Nëpër rrugë dhe sheshe njerëzit këndonin “Wir sind ein Volk”, “Ne jemi një popull”, ndërsa flamuri i ri gjerman valëvitej mbi Bundestag.
Kjo datë sot njihet si Dita e Unitetit Gjerman, një festë kombëtare që kujton jo vetëm bashkimin e një populli, por edhe fuqinë e lirisë dhe të Bashkimit Evropian. Ajo është një dëshmi se muret nuk zgjasin përgjithmonë, se zinxhirët thyhen dhe se popujt, kur bashkohen, mund ta kthejnë historinë në anën e tyre.
Nga Borea Lisi
